Uşaqlıq mioması: əlamətləri və müasir müalicə üsulları

Uşaqlıq mioması uşaqlığın əzələ qatından inkişaf edən xoşxassəli törəmədir. Bu, qadınlarda ən çox rast gəlinən törəmələrdən biridir və 50 yaşa qədər qadınların böyük hissəsində bu və ya digər ölçüdə mioma aşkarlanır. Miomalar demək olar ki, heç vaxt xərçəngə çevrilmir.

Əlamətləri

Bir çox mioma heç bir əlamət vermir və təsadüfən ultrasəsdə aşkarlanır. Əlamət verən hallarda aşağıdakılar müşahidə oluna bilər:

• Bol və uzun sürən menstruasiyalar, bunun nəticəsində qansızlıq və yorğunluq

• Qarının aşağı hissəsində ağırlıq və təzyiq hissi

• Tez-tez sidiyə çıxma və ya qəbizlik

• Bel ağrısı

• Bəzi hallarda hamilə qalmaqda çətinlik

Diaqnoz

Əsas müayinə ultrasəsdir. Ultrasəs miomaların sayını, ölçüsünü və yerləşməsini göstərir. Lazım olduqda MRT və ya histeroskopiya təyin edilir. Qansızlığı yoxlamaq üçün qan analizi də vacibdir.

Müalicə üsulları

• Müşahidə – kiçik və əlamətsiz miomalarda

• Dərman müalicəsi – qanaxmanı azaltmaq və ya miomanı müvəqqəti kiçiltmək üçün

• Laparoskopik miomektomiya – uşaqlıq qorunmaqla miomaların kiçik kəsiklərlə çıxarılması

• Histeroskopik miomektomiya – uşaqlıq boşluğuna doğru böyüyən miomalarda, kəsiksiz

• Uşaqlıq arteriyalarının embolizasiyası – seçilmiş hallarda

• Histerektomiya – çoxsaylı və böyük miomalarda, hamiləlik planı olmadıqda

Hamiləlik planlaşdıran qadınlar üçün uşaqlığı qoruyan üsullar üstünlük təşkil edir. Laparoskopiya ilə aparılan əməliyyatlar daha az ağrı və daha sürətli bərpa ilə müşayiət olunur.

Nə vaxt diqqətli olmaq lazımdır?

Menopauzadan sonra miomanın sürətlə böyüməsi nadir hallarda bədxassəli prosesin əlaməti ola bilər. Belə halda onkoginekoloq tərəfindən qiymətləndirmə vacibdir.

Ətraflı oxuyun: Laparoskopiya nədir? · Laparoskopiyadan sonra bərpa

Qeyd: Bu məqalə yalnız məlumat xarakterlidir və həkim müayinəsini əvəz etmir. Diaqnoz və müalicə üçün mütəxəssisə müraciət edin.