Uşaqlıq boynu xərçənginin müalicəsi: mərhələlərə görə seçimlər

Uşaqlıq boynu xərçənginin müalicəsi xəstəliyin mərhələsindən, şişin ölçüsündən, qadının yaşından və gələcək hamiləlik planlarından asılıdır. Müalicə planı onkoginekoloq, radioterapevt və onkoloqdan ibarət komanda tərəfindən hazırlanır.

Mərhələnin müəyyən edilməsi

Diaqnozdan sonra şişin yayılma dərəcəsini müəyyən etmək üçün ginekoloji müayinə, MRT, KT və ya PET-KT kimi müayinələr aparılır. Bütün müalicə qərarları bu məlumatlara əsaslanır.

Çox erkən mərhələ

Mikroskopik ölçüdə olan çox erkən şişlərdə bəzən konizasiya kifayət edir. Bu üsul uşaqlığı qoruyur və gələcəkdə hamiləliyə imkan verir.

Erkən mərhələ

Kiçik ölçülü, uşaqlıq boynu ilə məhdudlaşan şişlərdə əsas müalicə radikal histerektomiyadır. Bu əməliyyat zamanı uşaqlıq ətraf toxumalarla birlikdə çıxarılır və limfa düyünləri qiymətləndirilir. Beynəlxalq araşdırmalar göstərib ki, uşaqlıq boynu xərçəngində radikal histerektomiya üçün açıq əməliyyat bir çox hallarda laparoskopiyadan daha etibarlı nəticə verir. Ona görə cərrahi üsulu onkoginekoloq hər pasiyent üçün ayrıca seçir. Hamiləlik planlaşdıran seçilmiş pasiyentlərdə uşaqlığı qoruyan əməliyyat – trakhelektomiya mümkündür.

Lokal yayılmış mərhələ

Daha böyük və ya ətraf toxumalara yayılmış şişlərdə standart müalicə kimyaterapiya ilə birlikdə aparılan şüa terapiyasıdır. Buna daxili şüalanma – braxiterapiya da əlavə olunur.

Uzaq mərhələ

Xəstəlik uzaq orqanlara yayıldıqda sistem müalicə – kimyaterapiya, hədəf terapiya və immunoterapiya tətbiq olunur. Məqsəd xəstəliyə nəzarət və həyat keyfiyyətinin qorunmasıdır.

Ən yaxşı nəticə profilaktika və erkən aşkarlamadır: HPV peyvəndi, müntəzəm skrininq və anormal nəticədə vaxtında kolposkopiya.

Ətraflı oxuyun: Uşaqlıq boynu xərçəngi: risk amilləri · Konizasiya və LEEP

Qeyd: Bu məqalə yalnız məlumat xarakterlidir və həkim müayinəsini əvəz etmir. Diaqnoz və müalicə üçün mütəxəssisə müraciət edin.