Uşaqlıq boynu eroziyası: nədir və müalicə lazımdırmı?

"Eroziya" diaqnozu bizdə ən çox eşidilən ginekoloji diaqnozlardan biridir və çox vaxt lazımsız narahatlıq yaradır. Əksər hallarda "eroziya" adlandırılan vəziyyət əslində ektropiondur. Ektropion xəstəlik deyil, uşaqlıq boynunun normal fizioloji variantıdır.

Ektropion nədir?

Uşaqlıq boynu kanalının içini örtən nazik, qırmızımtıl hüceyrələr bəzən kanaldan kənara, uşaqlıq boynunun xarici səthinə çıxır. Müayinə zamanı bu sahə qırmızı ləkə kimi görünür və "yara" təəssüratı yaradır. Ektropion gənc qadınlarda, hamiləlikdə və hormonal kontraseptiv qəbul edənlərdə çox rast gəlinir.

Təhlükəlidirmi?

Ektropionun özü xərçəngə çevrilmir. Lakin oxşar görünüşü şişönü dəyişikliklər də verə bilər. Ona görə "eroziya" deyilən hər halda əvvəlcə PAP-smear və HPV testi aparılmalı, nəticələr anormal olarsa kolposkopiya edilməlidir.

Əlamətləri

• Çox vaxt heç bir əlamət vermir

• Bəzən çoxlu şəffaf və ya selikli axıntı

• Cinsi əlaqədən sonra az miqdarda qanlı ləkələnmə

Müalicə lazımdırmı?

Analizlər normaldırsa və şikayət yoxdursa, ektropion müalicə tələb etmir. Bu vəziyyət çox vaxt zamanla öz-özünə keçir. Narahatedici axıntı və ya təkrarlanan qanaxma olduqda həkim dondurma, radiodalğa və ya digər üsullarla müalicə təklif edə bilər. Analiz aparılmadan "eroziyanın yandırılması" düzgün yanaşma deyil.

Sizə "eroziya" diaqnozu qoyulubsa, əvvəlcə HPV testi və PAP-smear nəticələrinizi onkoginekoloq ilə dəyərləndirin.

Ətraflı oxuyun: HPV testi və PAP-smear · Kolposkopiya nədir?

Qeyd: Bu məqalə yalnız məlumat xarakterlidir və həkim müayinəsini əvəz etmir. Diaqnoz və müalicə üçün mütəxəssisə müraciət edin.