Dermoid kista nədir və niyə çıxarılmalıdır?

Dermoid kista (yetkin kistoz teratoma) yumurtalığın ən çox rast gəlinən xoşxassəli törəmələrindən biridir. Əsasən gənc və reproduktiv yaşda olan qadınlarda aşkarlanır.

İçində nələr olur?

Dermoid kista müxtəlif növ toxumaları əmələ gətirə bilən hüceyrələrdən inkişaf edir. Ona görə içində yağ, saç, dəri, bəzən hətta diş və sümük toxuması ola bilər. Bu qeyri-adi görünsə də, kista xoşxassəlidir.

Əlamətləri

Kiçik dermoid kistalar çox vaxt əlamət vermir və ultrasəsdə təsadüfən aşkarlanır. Böyüdükcə qarının aşağı hissəsində ağırlıq və ağrı yarada bilər. Ən böyük təhlükə yumurtalığın burulmasıdır. Bu, qəfil şiddətli ağrı ilə özünü göstərir və təcili əməliyyat tələb edir.

Öz-özünə keçirmi?

Xeyr. Funksional kistalardan fərqli olaraq dermoid kista öz-özünə sorulmur və yavaş-yavaş böyüyə bilər.

Müalicə

Müalicə laparoskopik yolla kistanın çıxarılmasıdır. Əksər hallarda sağlam yumurtalıq toxuması qorunur, bu da gələcək hamiləlik üçün vacibdir. Çox kiçik və əlamətsiz kistalarda bəzən müşahidə seçilə bilər. Dermoid kistanın bədxassəli çevrilməsi çox nadirdir və əsasən menopauzadan sonra rast gəlinir. Belə şübhə olduqda əməliyyatı onkoginekoloq aparmalıdır.

Ətraflı oxuyun: Yumurtalıq kistaları · Laparoskopik kista əməliyyatı

Qeyd: Bu məqalə yalnız məlumat xarakterlidir və həkim müayinəsini əvəz etmir. Diaqnoz və müalicə üçün mütəxəssisə müraciət edin.